محامية الشابة المشتكية في قضية حكيمي ترد: “لا وجود لأي ابتزاز.. وموكلتي تعرضت لحملة تشويه”
فـ آخر تطورات القضية اللي ما زالت متواصلة ضد اللاعب المغربي أشرف حكيمي، خرجات محامية الشابة اللي رفعات الشكاية، راشيل فلور باردو، بتصريحات كتوضح فيها موقف موكلتها من الكلام اللي كيدور على ابتزاز اللاعب.
فـ تصريح لـ”فرانس برس”، قالت المحامية أن موكلتها استقبلت قرار إحالة الملف للمحكمة الجنائية بارتياح كبير، وأكدت أن ملف القضية خالٍ تمامًا من أي مؤشرات على الابتزاز، وأن كل ما يُروج فهاد الاتجاه مجرد محاولات لتشويه الحقيقة.
“موكلتي ما غاديش تسكت على حملة التشويه”
وأشارت المحامية أن السيدة اللي تقدمت بالشكوى ما غاديش تبقى ساكتة على حملة التشويه اللي كتعرض ليها، وقالت بالحرف:
“اللي كتدير الشجاعة وتتكلم على اعتداء جنسي فالعَلن، كتواجه كثير من الشك والاتهامات، وهادشي هو اللي وقع لموكلتي. لكننا غادي نمشيو فطريق القانون حتى الآخر.”
وأكدت أيضًا أن فريقها القانوني غادي يركز فالمحاكمة على عرض الحقائق بشكل واضح وموضوعي، بدون ضجيج أو مؤثرات خارجية.
ووجهات المحامية رسالة مباشرة للناس اللي كيروجو لفكرة أن القضية فيها ابتزاز، وقالت:
“اللي كيهدر على الابتزاز، راه كيحاول يحرّف الملف ويبعد التركيز من جوهر القضية الحقيقي.”
تفاصيل من الشكاية
وكانت الشابة قد توجهت إلى الشرطة فـ فبراير 2023، وقالت فشكايتها أنها تعرضت للاعتداء الجنسي من طرف حكيمي فدارو، وأنها قدرت تدفعو وتخرج من المنزل بمساعدة صديقتها اللي جات خذاتْها، حسب أقوالها.
القضية ما زال ما وصلات للحكم النهائي، وكل طرف كيدافع على روايتو، فانتظار قرار المحكمة الجنائية فـ الأسابيع المقبلة.
وفي الوقت اللي القضية كاتزيد تعقيد، كيبقى الرأي العام متابع ومقسم بين الآراء، فانتظار ما غادي يبان من الحقائق داخل المحكمة.
